TACLOBAN CITY – Padayon an ginbubuhat nga assessment han Office of Civil Defense (OCD) Regional Office 8 ha kabug-usan nga naging danyos ngan epekto ha rehiyon han paglasurbo han bagyong Vicky nga nagdurot hin makusog nga pag-inuran ngan landslide.
Sumala kan Rey Gozon, Assistant Regional Director han OCD 8, ha pagkayana in waray pa ginpadara ha ira nga report bahin han naidurot nga danyos han bagyo ha sektor han agrikultura.
Samtang ha assessment han ira buhatan umabot ha duha an nahipatik nga casualty ngan duha gihapon an samaran ha nahitabo nga landslide ha Mahaplag, Leyte.Maabot naman ha napulo nga pamilya o 53 nga mga indibidwal an ginpailarom ha preemptive evacuation tungod han bagyo ngan ha pagkayana in nakabalik na an mga ini ha tagsa tagsa nga mga panimalay.
