TACLOBAN CITY – Ginhahangyo ha pagkayana han Northern Samar Provincial Government ha nasyonal nga gobyerno nga tugutan hira nga dire la anay magkarawat han mga returning residents o local stranded individuals (LSI) nga nangunguli ha ira probinsya tikang ha Manila, Cebu ngan iba pa nga mga lugar ha nasud.
Sumala kan John Allen Berbon, tagapagyakan han Northern Samar Provincial Government, tikang han bulkason an suspensyon han pagkarawat han mga LSI ha rehiyon in maabot ha 15 nga bus dayon an umulpot ha ira probinsya.
Ini an rason kun kay-ano nga nagkapupuno dayon an mga quarantine facilities han pipira nga mga bungto ha Northern Samar.
Dako gihapon nga problema ha pagkayana para ha provincial government an damo nga mga LSI nga nangunguli ha ira probinsya hin waray coordination o sumpayan ha ira tagsa tagsa nga mga LGUs.
Ha pagkayana in ginpapamulat pa han Northern Samar an magiging desisyon han national government bahin han ira hangyo nga tagaan anay hira hin panahon san-o nga mangarawat utro hin mga LSI ha ira probinsya.
