TACLOBAN CITY – Nakatalaan nga igpailarom ha state of calamity an bug-os nga probinsiya han Northern Samar tungod han grabi nga epekto han El Niño.
Sumala kan Rei Josiah Echano, head han Provincial Risk Reduction and Management Office (PDRRMO) han Northern Samar, 90 porsyento o kon 6,200 kaektarya na han mga kahagdaan an apektado han katmara.
Subay ha datos han Department of Agriculture maabot na hin 300 million an kabug usan nga danyos ha agrikultura han natura nga probinsiya.
Tungod hini, kulang na gihapon an ira suplay hin tubig ngan naggugugtak na iton mga umhanan nga dati in puno hin mga pananom.
Waray liwat makagtanom hin humay an maabot 5,000 nga mga parag-uma.
Agud masiguro nga diri kukulangon ha suplay hin bugas, nagdesisyon na an provincial government nga pumalit la anay hin bugas tikang ha iba nga rehiyon.
Bisan manggud han waray pa El Niño, aada la ha 77,000 metric tons hin bugas an napo-produce han Northern Samar.
Kon susumahon kulang na kulang ini tungod nga nakinahanglan 88,000 metric tons hin bugas an probinsiya ha sakob hin usa katuig.
Tungod hini, nagdesisyon an provincial government han Northern Samar nga magdedeklara hira hin state of calamity mahuman an consolidations han mga reports tikang ha 24 nga munisipyo nga ira nasasakupan para magamit an ira calamity fund.
Gintagan hin duon ni Echano nga sadang an ira pondo para mabuligan an mga parag uma nga apektado han katmara.
Gin-aghat liwat hini an mga parag uma hin humay nga himuon la anay nga alternatibo an pagcocopra ngan pagtanom hin abaca.
Padayon naman an ginbubuhat nga mga interbensyon han provincial government para mabuligan an mga molopyo hini.
Kaupod na dinhe an paghatag hin mga bangka nga de motor para ha mga parag- uma nga karuyag la anay mangisda samtang diri pa hira nakakagtanom hin humay.
