TACLOBAN CITY – Ginduduso yana han mga online sellers an No Video, No Return nga polisiya kasumpay han mga produkto nga ginbabaligya ha online stores.
Sumala kan Eleanor Etulle, Chief hiton Consumer Protection Division han Department of Trade and Industry Regional Office Vlll, kinahanglan nga makipagsumpayan han mga buyers ha ira mga ginpapalitan online kasumpay han nasabi nga polisiya.
Dire naman gindidire an nasabi nga polisiya basta dire la matatalapas an katungod han usa nga kunsumidor.
Waray manggud nakasurat nga sugad nga polisiya ha RA 7394 o “The Consumer Act of the Philippines”, lugod in kinahanglan la nga igpresentar an warranty ngan resibo han produkto agud mabalyuan ine kun mapamatud-an nga depektibo an produkto.
Nagpahimatngon gihapon ine ha mga mamaralit ha online nga magin tangkod ha online seller.
