MACARTHUR LEYTE–Magpapatuman an National Grid Corporation of the Philippines (NGCP) Visayas hin brownout yana nga maabot petsa 19 ngan 20 han Pebrero.
Ginmalatumat ni Michael Sabejon, Information Officer han NGCP Visayas, nga matatabo ine alas 9-10 hiton gab-i han ika 19 han Pebrero ngan alas 5-6 hiton aga han ika 20 han nasabi nga bulan kun diin apektado an Don Orestes Romualdez Electric Cooperative (DORELCO) Mayorga Substation.
Hinungdan hiton nasabi nga brownout an temporaryo nga pagtanggal hiton mga conductors ngan Overhead Ground Wire (OHGW) han mga struktura ha Mayorga-Javier 69kV line portion para han pagtabok han cutter suction dredger han MacArthur Iron Projects Corporation (MIPC).
Subay naman ha opisyal nga social media page han NGCP, nga igdedetermina han kooperatiba an mga apektado nga lugar, ngan ginsiguro nga bubuhaton han ahensya an ngatanan nga pitad agud nga ma-hibalik an kuryente ha dagmit nga oras.
Mababaruan nga han nakalabay la nga adlaw, in nagpagawas hin opisyal nga statement hi MacArthur Mayor Rudin T. Babante, nga papaningkamutan han ira opisina nga ig-atras, o kuhaon an nasabi Cutter Suction Dredger, agud nga dire na ine madayon hiton pagtabok, ngan maundang an operasyon.
