CATARMAN, NORTHERN SAMAR – Nagpahayag hin pag-klaro an Bureau of Fire Protection – Catarman Fire Station ha nahipatik nga pan-iscam ha mga lokal nga establisyemento gamit an ngaran han Regional Director han BFP Region 8 dida han mga nakalabay nga adlaw.
Sumala kan Catarman Municipal Fire Station Acting Fire Marshall, FINSP. Adrian Dacut, nga nakakarawat an ira istasyon pinaagi hiton delivery, hin binulto-bulto nga pagkaon nga supplies nga waray sarabutan ngan dire gihapon otorisado han ira buhatan.
Nakakarawat an fire station hin pira ka-boxes han pizza ngan pira ka-kilo hiton karne nga maabot ha kabug-usan nga kantidad hin sobra P30,000.
Sumala ha mga delivery riders nga nakakarawat an ira gintratrabahuan nga mga establisyemento hin tawag tikang ha nagpakilala nga Regional Director han BFP nga hi FCSUPT. Aldwin Salazar, ngan ginmadohan hira nga ig-durayhag an mga gin-order ha Catarman fire station. Nga kun diin, dayon naman nga sumugot an mga ini mahitungod nga tikang man daw ini ha mao nga opisyal.
Dugang ni Dacut, nga naagi mangud ha istrikto nga government procurement protocols an mga buhatan hiton BFP kun namamalit hin mga suplay, ngan iton opisyal nga transaksyon in dire ginbubuhat pinaagi hiton unofficial nga tawag ha telepono o informal request.
Ira gihapon ginberikpika ha ira direktor nga kun diin mahugot hini nga nagpahayag nga waray hiya magpalusad hin bisan ano nga mando o kun naghimo hin tawag ha mga establisyemento.
Ginpahimatngun naman han opisyal ha mga business owners ha lugar nga kun may magpapakilala nga tikang ha ira buhatan in siguraduhon nga tikang ha ira official hotline iton numero ngan dire bumaton kun makakarawat hin mga kahina-hinala nga mga tawag.
Samtang, padayon naman nagbubuhat hin imbestigasyon an BFP Regional Office agud matudlok ngan madakop an nagpapaluyo hini nga insidente.
