NATIONAL NEWS – Nalahusan na han National Food Authority an upgraded palay procurement target hine ha syahan nga unom kabulan han tuig pinaagi han mga pitad han NFA Council ha pangunguna ni Agriculture Secretary Francisco Tiu Laurel Jr., nga pahitas-an an buying prices, pakusgon an national buffer stock ngan pahitas-on an kita han mga parag-uma.
Dida han Hunyo 13, an palay procurement han NFA in umabot ha haros 3.37 milyon o 50 kilos nga sako, lumahos hin gutiay ha upgraded target nga 3.36 milyon nga sako. Ha pagkayana, an kabug-os nga imbentaryo in supresyente na para masakop an upat kaadlaw nga national bufferstocks in kaso magkamay-ada hin emergencies.
Ginpadig-on ni NFA Acting Administrator Larry Lacson an patapod han ahensya nga igpapadayon hine an pagpalit hin humay ha mas hitaas nga presyo kumpara ha mga negosyante, nga nagbabaton naman ha mga panawagan han mga parag-uma para ha padayon nga suporta.
Ha kabug-usan nga budget nga P17 bilyon nga igin alutaga para ha pagpalit hin bugas yana nga tuig, kaupod an rollover funds tikang ha nakalabay nga tuig, in napabilin la gihapon han NFA an sobra-kulang P12 milyon para ha palay procurement ha masunod nga unom kabulan han tuig.
