Nagpatapod an National Food Authority Regional Office VIII (NFA-8) nga makakalaom an mga parag-uma, kooperatiba, irrigators’ associations ngan farmers’ associations hin patas ngan mas maupay nga buying price han ira humay ha tiarabot nga main harvest season nga matikang ha kabutnga-an han Setyembre tubtob Oktubre ngan magpapadayon ngadto ha Disyembre.
Sumala kan NFA-8 Regional Manager Jasmin Lintag, yana nga panahon an buying price han NFA para ha clean and dry nga humay in P27 kada kilo ha Leyte, Eastern Samar ngan Western Samar, P28 kada kilo ha Biliran, ngan P30 kada kilo ha Southern Leyte ngan Northern Samar.
Ginpahayag ni Lintag nga diri pa hira maaram an eksakto nga buying price para ha masunod nga main crop, pero ginpasiguro niya nga magigin patas ngan mas hitaas ini kumpara han presyo nga iginhahatag han mga grain trader ha Rehiyon Otso.
Sumala ha iya, kada semana nagbabag-o an buying price han NFA pinaagi han ira gintatawag nga pricing scheme. Kada semana nagbubuhat hira hin survey ha bug-os nga rehiyon ngan iginpapadara an resulta ngadto ha Central Office, nga amo an basehan han buying price para ha wet ngan dry nga humay nga mahitaas hin P1 tubtob P2 kontra han prevailing buying price ha tagsa nga lugar.
Pero ha pag-abot han main harvest season, igsususpinde anay an nasabi nga pricing scheme ngan magpapatuman an NFA hin fixed buying price agud magin pareho an presyo ha pagpalit han humay durante han panahon han kadam-an nga ani.
Ginpahayag ni Lintag nga amo ini an pamaagi han NFA para matagan hin angayan nga presyo an mga parag-uma samtang ginpapabilin nga kompetitibo an pagpalit han ahensya hin humay ha bug-os nga Eastern Visayas.
