TACLOBAN CITY – Nag file hin kaso nga perjury hi outgoing Leyte 2nd district Board Member Niccolo Villasin ala kontra han napirde nga kandidato ka board member han Leyte nga hi Nestor Abrematea ha Office of the City Prosecutor ha Tacloban dida han nakalabay nga Biyernes, Mayo 24.
Subay ha complaint nagbinuwa daw hi Abrematea nga residente ini han Brgy. Belisong Tabon Tabon, Leyte.
Sumala kan Niccolo nga han personal hiya nga pumakadto ha Brgy Belisong ngan tanan nga ira ginpakianhan in nagyakan nga diri hiya naukoy didto.
An balay naman nga gintutudlok hini kumo iya residensiya in diri daw pwede nga mag-qualify kumo usa nga balay tungod nga waray hini bungbong, higdaan , CR ngan waray man la kuryente o linya hin tubig.
Ha kopya gihapon han kan Raissa Villasin Rejoinder Affidavit nga ginpadara pinaagi hin surat nga may address nga Brgy. Belisong han Tabon Tabon, Leyte in gin- return to sender ngan ginmarkahan han mailman nga “moved, no one to receive.”
Mababaruan nga hi Abrematea in usa ha katugbang ni Raissa Villasin kumo board member ha segundo distrito han Leyte han katatapos pala nga eleksyon.
Partikular gihapon nga ginkwestiyon ni Niccolo an baton ni Abrematea ha question number 19 ha judicial complaint affidavit hini kon diin sumala hini nga ” waray residential house hi Raissa ha Brgy Cuta Barugo Leyte”.
Nagbinuwa daw ini tungod sumala kan Villasin ginpipirit hini an kapitan han Brgy. Cuta nga mag issue hin certification nga diri residente an iya bugto ha natura nga barangay.
Waray daw sumugot an kapitan lugod nag issue ini hin certificate nga nagpapamatuod nga didto naukoy hi Raissa.
Ha luyo hini, naghimo himo la gihapon daw istorya hi Abrematea nga diri didto residente an iya bugto.
Mababaruan nga gin-dismiss na han korte an ginfile nga kaso nga perjury ni Abrematea ala kontra kan Raissa Villasin dida han nakalabay nga Abril 11.
Ginpanhimuwa gihapon ni Board Member Villasin nga ginhulga niya an respondent mahuman an preliminary conference han disqualification case nga ginpasaka liwat hini ha iya bugto ha Comelec Central Office.
Ha usa nga interview han Bombo Radyo kan Abrematea dida han nakalabay nga Huwebes, nagyakan ini nga ginhulga hiya ni Atty. Villasin.
Sumala kan Niccolo diri matatawag nga panhulga an iya pagsiring nga magpasalamat an respondent nga buotan an iya tatay.
“Hadto ko pa unta hiya pa-filan hin kaso nga perjury tungod han pag file nira hin complaint han akon bugto. Sumiring hi Papa ha akon, ayaw nala ito, pabay-i nala ito. So amo an ak siring on that premise. I don’t see any threatening word ha pagsiring ko pasalamat ka buotan ak tatay”, pamahayag ni Villasin ha usa nga pakikipaghimangraw han Bombo Radyo Tacloban.
Andam daw gihapon ini nga umatubang kon in kaso magpasaka ini hin disbarment case ala kontra haiya.
