TACLOBAN CITY – Gin-uuran ha pagkayana hin pagdayaw an usa nga napirde nga kandidato ha pagkakonsehal han bungto han Palo, Leyte nga nanguna ha pagtanggal han iya mga campaign materials kun diin imbes nga ighapil ha basurahan in ginrecycle ngan ginhimo pa nga mga bags ngan accessories.
Sumala kan Ian Andres Sevilla, kapitan han Brgy. Luntad ha mao nga bungto, imbes nga maging masulub-on hiya ha iya pagkapirde han eleksyon in nahuna-hunaan niya an mao nga inisyatibo agud nga diri makarag an mao nga mga campaign material nga pwede pa marecycle ngan magamitan.
Dugang pa hini nga ha pagkayana in padayon an ira pagkolekta han mga tarpaulins ngan iba pa nga mga campaign materials agud nga himuon nga mga bag, kalo ngan iba pa nga mga produkto.
An mga ini in ginpapandistribwer hin libre samtang ginpapaghunahunaan na gihapon nira nga igbaligya ini para mapagkuhaan gihapon hin income han ira mga molopyo.
Gin-aghat naman hini an iba pa nga mga kandidato han nakalabay nga eleksyon nga dad-on gihapon an ira mga tarpaulins ha ira material recovery facility para magamitan an mga ini ngan diri maging adisyunal nga basura o hugaw ha ira bungto.
Pamatian ta an bahin han komento ni Ian Andres Sevilla, kapitan han Brgy. Luntad ngan dumalagan komo Konsehal han Palo, Leyte
