TACLOBAN CITY – Padayon pa nga gintutudlok han mga otoridad an pangilal-an han patay nga lawas nga nakit-an ha parte han Purok 4 Brgy. Socorro, Catbalogan City.
Sumala kan Pol. Lt. Col. Jonathan del Rosario, Chief of Police han Catbalogan City Police Station, ada na ha state of decomposition han makit-an an mao nga patay nga lawas han usa nga lalaki.
Usa ha ginhihingita nga rason han pagkamatay han biktima an posibilidad nga nagbigti ini tungod nga nakabitay ini ha puno gamit an wire han makit-an ini.
Dire naman gintatanggal han mga kapulisan an iba pa nga anggulo bahin han mao nga insidente.
Ha pagkayana in waray pa katutudlok an pangilal-an hini pero una anay nga may usa nga pamilya nga dumangop ha mga kapulisan tungod nga may nawawara nga ira paryente.
Pero han makit-an han mga ini an patay nga lawas, ginkumpirma naman han mao nga pamilya nga dire ini asya an ira ginbibiling nga paryente.
