ABUYOG, LEYTE – Gin malatumat ni Abuyog Community College President, Dr. Clemelle Montallana nga bisan ano pa an politikal nga paguto han usa nga indinbidwal, kinahanglan nga an pag-ugop han mga Pilipino in ha Pilipino la gihapon mahitungod nga an gin-iistoryahan dinhi in an nasud, dire an pipira la katawo.
Gin eksplikar gihapon ni Montallana nga an usa nga nasud in mayda katungod pag-responde ha iba nga nasud pinaagi han gintatawag nga diplomatic protest o bisan pinaagi han agresyon, kun diin dinhi naiiba an Pilipinas mahitungod nga imbes nga agresyon, in nakikigsumpayan an nasud pinaagi han diplomatic protest.
Dugang pa hini, an China Daily, nga nag-post han nagsasarang yana nga AI-generated video han usa nga unggoy nga nakasul-ot hin Barong Tagalog ngan salakot, in usa nga state-run media karuyag sidngon, an nasud China mismo an nagpopondo hini agud magpadayon an operasyon.
Manunumduman nga dida han Hulyo 10, duha kaadlaw ugsa an ika-10 nga anibersaryo han 2016 Arbitral Ruling Award, ginpagawas han China Daily an nasabi nga video, nga dayun naman nakakuha hin mga pagsukna tikang ha katawhan ngan magkadiru-dilain nga ahensya han gobyerno kalakip na an Department of National Defense nga nagpahayag nga usa ini nga panginsulto, makababaraka, ngan dire pwede karawton nga pahayag sanglit nagdumara an Pilipinas hin diplomatic protest kontra ha China.
Sumala pa kan Montallana, mayda rason han gindudumara nga agresyon han China ha mga nasud nga kahirani hini kalakip na an Pilipinas, kun diin an gin aagawan nga kadagatan in baga-baga hin karsada nga amu an aragian han ngatanan nga mga produkto—mapa-import man o export, han mga kahigrani nga nasud kalakip na an China ngan Pilipinas, kun diin ginkokontrol ini han China pinaagi han pagigin agresibo kumo pagpakita han ira pagigin dominante ha lugar.
Dire la naman ini an paagi han destabilisasyon nga ginbubuhat han China ha Pilipinas, kun diin sumala kan Montallana, mayda pa iba nga paagi an China agud rubaon an Pilipinas, ngan dire maaram an kadam-an nga mayda pira nga politiko ha Pilipinas nga mga pro-China ngan padayon nga naugop ha mga naratibo han China.
Pira han mga ini hi Sen. Rodante Marcoleta nga nagpahayag nga ‘i-give up’ nala an Scarborough Shoal sugadman hi Sen. Robin Padilla nga nagmalatumat nga paprehas man ‘unggoy’ an pagkita han mga ‘busag’ nga mananakop ha mga Pilipino ngan Intsik sanglit dire maididiwara an pagkakaparehas han duha.
Sugadman, sumala kan Montallana, dire ini amo an hulagway han damo nga Pilipino mahitungod nga ira la ini posisyon, ngan dire han ngatanan.
