TACLOBAN CITY – Nagin malinapuson an gindumara nga mock elections han Commission on Elections-Eastern Samar dida han nakalabay nga adlaw, Enero 25, ha Brgy. Taboc ngan San Gabriel ha Borongan City ngan ha Brgy. 8, Cluster 9, ngan Brgy. Maslog ha bungto han Lawaan.
Nagtikang an mock elections dida han alas-7 han aga ngan nahuman han pasado alas-10 han aga ha kaparehas nga adlaw.
Gindumara ine kumo pangandaman ha tiarabot nga National and Local Elections yana nga Mayo 12. Panuyuan gihapon hine nga ma-testingan an kapabilidad han mga Automated Counting Machines nga gin kontrata han COMELEC ha South Korean firm nga Miru Systems—nga gagamiton ha piniliay, agud matagan dayun hin solusyon in kaso nga magkamay-ada hin problema.
Presente naman ha nasabi nga mock election an Parish Pastoral Council for Responsible Voting (PPCRV), National Citizens’ Movement for Free Elections (NAMFREL), Philippine National Police (PNP), Philippine Army (PA), ngan mga opisyales han mga barangay.
Gin partisiparan an mock elections hin 365 nga botante tikang ha Borongan City—99 nga botante tikang ha Brgy. Taboc ngan 88 nga botante tikang ha Brgy. San Gabriel; mayda gihapon 80 tikang ha Brgy. Maslog ngan 98 naman nga botante tikang ha Brgy. 8 Cluster 9 han Lawaan, Eastern Samar.
Manunumduman nga an Eastern Samar la ha bug-os nga Sinirangan Bisayas an gindumara hin mock elections yana nga tuig kumo pangandaman han tiarabot nga piniliay. (via Bombo Shiela Encio)
