TACLOBAN CITY – Gindumara kakulop nga adlaw, Abril 25, an Miss Philippine Earth Beach Wear Competition ha Baybay Beach, Borongan City.
An nasabi nga kompetisyon in ginbuligan han 29 kabug-os nga kandidata tikang ha magkaduru-dilain nga parte han nasud.
Ha pakipaghimangraw ni Bombo Vince Vivas ha programa nga Bombo Hanay Bigtime kan Hon. Jose Ivan Dayan Agda, City Mayor hiton Borongan City Eastern Samar, gin pahayag hine nga dako ine nga bulig para makaghatag hin dako nga hibaro ha ira mga kabataan kasumpay han pagproteher haira kalibungan ngan sugadman pagduso ngan pagpakilala han ira turismo ha Borongan City.
Dida han ikaduha kaadlaw in ginbisita han mga kandidata an Isla han Divinubo ngan ginprubaran an magkaduru-dilain nga water activities sugad han diving, snorkeling, banana boating, ngan kayaking.
Presente gihapon ha nasabi nga kompetisyon an mga reigning queens nga hira Miss Philippines Air – Kerri Ann Reilly, Miss Philippines Water – Jemimah Joy Zabala, Miss Philippines Fire – Sha’uri Livori, ngan Miss Philippines Eco Tourism – Athena Claire Auxillo
Nakuha naman ni Matanao, Davao del Sur candidate Irha Mel Inutan Alfeche an Bronze han nasabi nga kompetisyon, Silver kan Iligan City candidate Kristel Codas, ngan nakuha naman han kandidata han Makati City nga hi Sam Samara an Gold.
Samtang, dako naman an nagin pasasalamat ni Mayor Ivan Dayan Agda ha nagin pagbisita han mga kandidata han Miss Philippines Earth 2024.
