TACLOBAN CITY – Padayon nga ginhahalpat han mga otoridad an duha nga suspek nga nagpapaluyo han panbuno-patay han duha nga helper ha usa nga tindahan hin letson manok ha Brgy.72, PHHC, syudad han Tacloban.
Sumala kan PSInsp. Edwin Cañamaque, Station Commander han Abucay Police Station, nga ha pagkayana in natudlok na nira an duha nga suspek nga hi Lito Daguman, 27 anyos an pangidaron ngan Christian Libasno, 18 anyos an pangidaron ngan parehos residente han Brgy. Parasanaon, Pinabacdao, Samar.
Subay ha inisyal nga imbestigasyon nga posible nga personal nga delito an hinungdan han mao nga pamatay mahitungod han daw gin-aalegar nga ginsasayop han usa ha mga biktima nga hi Gino Sabaclin hi Daguman nga nagkuha han iya cellphone.
Ha pagkayana in padayon pa an gindudumara nga imbestigasyon han mga kapulisan ngan igin-aandam na gihapon an kaangayan nga kaso para han mga suspek.
