TACLOBAN CITY — Ginkompirma han Kapulisan ha Sta. Fe pinaagi han ginbuhat nga validation han ira intel officer nga tinood nga may nahikit-an nga armado nga grupo ha Brgy. San Miguelay, Sta. Fe, Leyte.
Sumala kan PSInsp Sheena Layog, Hepe han Sta Fe PNP, nga ha pagkayana diri pa nira makompirma kun an nasipatan nga grupo in mga miyembro han New Peoples Army o criminal group la.
Sugad man padayon an ira ginbubuhat nga monitoring ha tanan nga parte han mao nga bungto ngan nakapreposition an presensya han kapulisan ha kada barangay.
Samtang, gin-aghat naman ni PSInsp Layog an publiko nga makigbuligay ha kapulisan ingkaso nga may makit-an utro nga armado ngan mga urasahon nga mga indibdwal.
Manunumduman nga didan nakalabay nga mga adlaw in napuno hin kahadlok an mga residente han Brgy. San Miguelay, Sta. Fe, Leyte tungod ha nasipatan nga armado nga grupo nga gintutuhan nga mga NPA ha mao nga lugar.
