STO. NINO, SAMAR – Naglipay an usa nga asosasyon han parupangisda mahuman an ira malinampuson nga pag-harvest han maabot 638.5 ka-kilo han bangus ha Sto. Nino Samar, dida han mga nakalabay nga adlaw.
Ini nga higayon in nagin malinampuson mahitungod han pagburublig han 16 nga miyembro han Sto. Nino Marginal Fisherfolks Association o StoMafa, usa nga 2023 beneficiary han BFAR SAAD Program Phase II, kumo kaparte han ira aquaculture project ha ilarum han mao nga programa.
An Special Area for Agricultural Development (SAAD) Program han Bureau of Fisheries and Aquatic Resources in kaparte ha pagsuporta han ahensya ha mga komunidad han parupangisda agud mapakusog an ira pakabuhi ha pamamaagi han production inputs, teknikal nga training, ngan iba pa nga kinahanglanon nga bulig.
Sumala kan BFAR Region 8 Information Officer, Christine Gresola nga importante an sugad hini nga mga proyekto agud masigurado an padayon nga produksyon han isda ngan pagribhong han sektor han pangingisda ha bug-os nga rehiyon.
Dugang pa hini nga padayon nga ginpapahalawig han BFAR-8 an ira suporta ha mga fisherfolk association ha bug-os nga Sinirangan Bisayas agud mas damo pa nga komunidad an makakabenepisyo ha sugad nga proyekto.
Samtang, ginlalauman naman nga magsisirbe nga inspirasyon an kalampusan han StoMAFA ha iba pa nga asosasyon han parupangisda agud pakusgon gihapon nira an ira produksyon ngan aktibo nga maki-usa ha mga programa han ahensya
