TACLOBAN CITY – Ginpahayag han militar nga nakukurian na an mga New People’s Army (NPA) ha pagrekober han mga lugar ha Leyte kon diin dati hira nga may makusog nga suporta.
Ini mahuman nga madis-mantle an duha nga guerrilla fronts ha probinsiya yana nga tuig.
Sumala kan Brig. Gen. Zosimo Oliveros, commander han 802nd Infantry Brigade, may pipira nga mga communist terrorist group nga nagproprobar nga magrecruit utro ha Leyte pero pakyas an mga ini nga makakabig utro hin bag-o nga miyembro.
Tungod manggud nga an mga residente ilabi na ha mga tay-aw nga lugar in nagsusumat dayon ha Philippine Army kon mayda mga NPA nga nakada ha ira lugar ngan nagproprobar pagrecruit ha ira nga bumulig ha rebolusyonaryo nga kagi-usan.
Dugang pa ni Oliveros nga dida han nakalabay nga Enero yana nga tuig, nahawan na han Philippine Army an duha nga guerrilla fronts ha third district han Leyte, pira nga parte han central ngan southern part han Leyte .
Nakabulig daw gihapon ha kampanya ha pagpuypoy ha insurhensiya an pag deploy hin retooled community support program teams ha mga tay-aw nga lugar para mamintenar an peace and development efforts kasugbong an mga local government units ngan national government agencies.
Nagtutuo hi Oliveros nga diri pa napupuypoy an presensiya han mga NPA pero waray na an mga ini kapas nga maglunsar hin mga pan-aatake ha tropa han gobyerno.
