TACLOBAN CITY – Ginpahayag han Tacloban City Commission on Elections (COMELEC) Office nga waray bisan usa nga nagkandidato ha syudad han naglabay nga eleksyon han Mayo 9 nga naglapos o nag-overspending ha ira mga ginsumiter nga Statements of Contributions and Expenditures (SOCE).
Sumala kan Atty. Ramon Dadulla Jr., Tacloban City Comelec Officer, basar ha ira nakarawat nga mga SOCE han mga kandidato, tanan han mga ini in nagsunod han maximum limit nga gintutugot han balaud para han ira mga nagastos han naglabay nga kampanya.
Nahibaruan nga ha tulo nga mga nagkandidato nga mayor, duha la an nagsumiter hin SOCE, tulo nga vice mayor, ngan unom naman nga mga nagkandidato kakonsehal an waray magsalawad hini.
Nahibaruan gihapon nga basar ha ginsumiter nga SOCE ni Mayor Alfred Romualdez, maabot ha P351,150 an iya total expenditures han naglabay nga eleksyon, P176, 873 naman kan outgoing Vice Mayor Jerry Sambo Yaokasin, sugadman kan Raymond Romualdez nga nagkandidato ka-bise alkalde nga umabot ha P308, 102 an total expenditures ngan hi Vice mayor-elect Edwin Chua nga umabot ha P24, 250 an nagastos ha iya pangangampanya han naglabay nga piniliay.
