TACLOBAN CITY – Nabalabgan han mga tawuhan han Tacloban City Jail Male Dormitory an pira nga kontrabando nga ginprubar pagsulod ha nasabi nga pasilidad dida han katungtungan han kapatrunan han syudad han Tacloban.
Sumala kan Tacloban City Jail Male Dormitory Jail Warden, JCInsp. Benedicto Ramirez Jr., durante han gindumara nga roving inspection ha may garden area han pasilidad, nakit-an han ira tawuhan an usa nga package nga nakaputos hin itom nga tela ngan nakapilit gamit an scotch tape, nga gintotoohan ginlabay tikang ha gawas han alad.
Dugang pa ni Ramirez, nagduda an ira tawuhan nga posible ilegal nga kontrabando an nakuha nga package sanglit ginkuhaan ini hin litrato ngan dayon nga nakigsumpayan ha PDEA, Brgy, Official, ngan media kumo mga testigos ngan kaparte han sakto nga proseso.
Ha pag-abri han package, nakuha an tulo ka-sachet han gin aalegar nga shabu, usa ka-sachet han gin aalegar dried marijuana leaves, tulo nga lighters, tulo ka-botelya hin acetone, ngan usa nga naka-rolyo nga foil.
Ginturn over naman an mga nakuha nga ebidensya ha Philippine Drug Enforcement Agency (PDEA) para ha dokumenstasyon ngan kaangayan nga pag-eksamin.
Samtang, padayon naman an gindudumara nga imbestigasyon han mga otoridad ha pakigkoordinar ha Tacloban City Police Office agud matudlok an mga responsable ha paglabog han mga kontrabando.
Padayon pa gihapon an pagtirok han mga ebidensya ngan testigos nga makakagtudlok ha Person/s Deprived of Liberty (PDL) nga papaabutan unta han nasabi nga kontrabando.
