TACLOBAN CITY — Naghahangyo an mga kasundaluhan ha mga kag-anak nga mahugot nga bantayan an ira tagsa anak kontra ha grupo han kumonista nga magdudumara hin rally bahin ha naging resulta han eleksyon.
Sumala kan Cpt. Ryan Layug, tagapagyakan han 8th Infantry Division Philippine Army, mayda ngadaw mga grupo han kabataan nga nananawagan nga pumakanhi ha siyudad han Tacloban agud magkamayda hin katitirok.
Dugang pa hini, dida han nakalabay nga gab-i in mayda hira nakuha nga impormasyon nga magdudumara daw hin haluag nga gios-protesta an liderato han CPP-NPA bahin ha ngadaw panlimbong han nakalabay nga eleksyon.
Pagklaro pa hini nga kabastusan daw ini ha mga personahe han COMELEC ngan DepEd nga nagbantay ngan nagsiguro nga an mga botos han mga katawhan in maging talwas.
Mahugot naman an ira pagmomonitor ha nasabi nga impormasyon ha kun patinunan-o nakadangat an mao nga impormasyon ha mga organisasyon han mga kabataan.
