TACLOBAN CITY – Nangangandaman na an mga kapulisan ha pagbabantay ha ginlalauman nga pagkadaramo han mga mangunguli nga mga katawhan ha Tacloban yana nga tikaharani na an kapatrunan han syudad.
Sumala kan PCapt. Concas Castillo, Station Commander han Police Station 1 San Jose, mahugot nga ginbabantayan han mga kapulisan an DZR airport tungod ha posibilidad nga humitaas an volume han mga pasaheros sugadman an mga mangunguli ha Tacloban.
Nag-aandam na gihapon hira ha pagdedeploy han ira mga personnel ha magkadirudilain nga area han siyudad agud mag-asistir ha mga katawhan.
Ha pagkayana in diri pa gud sugad kadamo han mga katawhan o nabisita ha siyudad pero padayon an pangandaman han mga kapulisan agud maging mahimyang an tikaharani nga kapiyestahan han siyudad.
