TACLOBAN CITY – Ginkikita nga an mga naabat nga bagyo han mga nakalabay nga bulan in an usa nga ginkikita nga rason han pagdagmit han inflation rate ha nasud.
Sumala kan TFCCCI Information Officer Hon. Colai Go nga siyahan mangud nga naapektaran kun mayda nasulod nga kalamidad in an sektor han pagkaon sugad nala hiton humay, utanon, isda ngan livestocks nga kun diin, nagkakamayda hin paghamubo ha suplay han mga ini.
Dugang pa hini nga matungod hiton hamubo nga suplay in dire nalilikayan nga nagkakamayda hin pagkiwa ha presyo han mga nasabi nga produkto.
Nasulod gihapon dinhi iton logistics (labor ngan production costs) nga danay nahitaas kun mayda kalamidad, sugad man iton gastos ha transportasyon han mga produkto ha mga merkado.
Ginkikita gihapon nga rason in an nagtitikahirani nga holiday season kun diin nahitaas iton demand han mga consumers ha usa nga produkto partikular na ha mga karne ngan delata.
Manunumduman nga nahipatik an 2.3% nga inflation rate ha nasud dida han nakalabay nga Oktubre rason han paghitaas han presyo han mga papliton ngan serbisyo.
