TACLOBAN CITY– Nagtitikadamo an kaso han mga teenager nga nagbuburod ha Pilipinas. Ginkokonsidera na nga ini in national social emergency. Haros 24 nga teenager an nanganganak kada oras ha Pilipinas.
Pira ha mga nagbuburod nga bata in igintatago ha kag-anak o pamilya an ira pagbuburod amu nga diri nagkakamay-ada hin sakto nga prenatal check up. Importante an check up para mahibaruan an kondisyon han nanay ngan han baby ngan malikayan an mga komplikasyon ha panganganak.
Kun sobra ka bata nga magbuburod, puydi nga magakmay-ada hin gestational hypertension o humataas an blood pressure. Puydi gihapon nga magdurot ini hin preeclampsia nga puydi maiuli ha premature nga panganganak.
Mas masukot nga premature an panganganak han teenager nga naburod. Kun diri sakto an edad, puydi nga diri pa bugos an mga internal organs amu nga mas nakukurian nga mabuhi an baby.
Hataas an posibilidad nga hamubo an timbang han baby ngan kikinahanglanon hini hin ventilator ngan incubator.
Hataas gihapon an kaso han postpartum depression o duro nga pagkasubo, nawawarayan hin gana ngan paglaum pagkahuman manganak. Tungod hini, danay in napapabay-an an ira bago nga anak nga baby.
Napakaimportante nga magkamay-ada hin prenatal check up ha mga burod labi na ha mga teenagers. Komunsulta ha health center o private OBGYN kun nahibaruan nga burod an usa nga teenager.
