TACLOBAN CITY – Nagkaurusa iton pipira nga mga kabataan ha Samar para igkampanya an kandidatura han ira ginduduso nga tandem pagkapresidente ngan bise presidente ha 2022 elections nga hira Vice President Leni Robredo ngan Davao City Mayor Sara Duterte.
ROSA 2022 Movement an tawag ha ira grupo kon diin nagdumara ini hini parada ha Catbalogan City, Samar sul-ot an busag nga t-shirt nga may naka-imprinta nga RoSA, nga nangangaruyag sidngon Robredo ngan Sara.
Subay ha facebook page nga RoSA – Robredo Sara 2022, natuod hira ha kapas hiton mga babaye nga lider.
“Natuod an kami nga kabataan han Samar nga kun hi VP Leni Robredo ngan Mayor Inday Sara Duterte and mag daog in mas magigin malimpyo an pangobyernohan han Pilipinas ngan maipapadayon an mga mag upay nga pitad nga natikang Pres. Rodrigo Duterte” subay ha post.
“Wag matakot umangat, suportahan si Mayor Inday at VP Leni, para siguradong angat buhay lahat”, guliat han mga kabataan nga nagpartisipar han parada.
Mababaruan nga han nakalabay nga Biyernes, Abril 22, nagdumara gihapon hin pareho nga aktibidad an mga kabataan ha Capoocan ngan Carigara ha Leyte.
