TACLOBAN CITY – Nagpahugot hin seguridad an mga iskuylahan ha syudad han Tacloban mahuman an nahitabo nga pamusil ha usa nga iskuylahan ha syudad.
Kumo baton han di pala maiha nga insidente, nagdumara hin collaborative meeting an kapulisan kaupod an Department of Education ngan lokal nga pangobyernuhan han syudad kabahin han seguridad.
Sumala kan Tacloban National Agricultural School Assistant Principal, Nilo De Paz, nagpalusad hin kamanduhan an Superintendent han DepEd kasumpay han pagpapahugot han seguridad han mga iskuylahan ha syudad han Tacloban.
Mahitungod ha kakulangan ha budget para han pag-hire hin mga security guards nga magbabantay ha iskuylahan, gin pahimulusan han Tacloban National Agricultural School an ira mga rover ngan senior scouts para mag-asister ha security guards ha panginano han mga bags ngan iba pa nga dara han mga masulod nga istudyante.
Nagtikang an pagpatuman han nasabi nga pitad dida han nakalabay nga adlaw ngan magpapadayon kutob ha pagkalma o pag-upay han sitwasyon.
Kasumpay pa hini, magkakamay-ada gihapon hin checking ha mga bags ha sulod han klasrum nga pagbubuhaton naman han adviser han klase.
Nanawagan naman ini ha mga kag-anak nga panginanuon an ira mga anak ugsa sumulod ha iskuylahan—kun may-ada ba an mga ini gin-aabat, problema, o ano paman, mahitungod nga hira an mas nakakakilala ha mga ini labaw ha ngatanan.
