-- Advertisements --
TACLOBAN CITY – Maaram ba kamu kabombo nga an pantog in pupuydi nga makatirok hin ngada 2 ka tasa hin ihi.
Pero diri karuyag signgon nga dapat mo na nga hulton ini nga mapuno ugsa ka pumakadto ha banyo para ini in maigawas tanan.
Sumala ha mga eksperto, mas makakaupay para ha aton an umihi kun kita in makaabat na hin iihi-ihi.
Kun an pag ihi in pupugngan, adi an mga posible nga sakit nga imo makuha:
- Makakaabat hin sakit ha puson o pelvic area o masakit nga pantog ha kada pagpupugong pag ihi. Danay in baga hin mabuto na an pantog o ini in magawas na.
- Nagkakamay-ada hin diri mapugngan nga paggawas han ihi o incontinence kun diin kaudgan nga ginpupugngan an pag ihi tungod posible nga nagkamay-ada hin problema ha pelvic floor muscles, tungod nga na-overstretched o nabanat an pantog. Kun masukot nga mabanat ngan mahalu-ag an masel han pantog, diri na kaya nga pugngan an pagturo han ihi amu nga waray ka mabubuhat kun diri magsulot nala hin diaper o lampin.
- Mawawara hin kapas o kakuri nga pagawson an ihi kun kaudgan nga pupugngan an pag ihi bisan nga ha pag abat mo in puno na an imo pantog. Ini in pupuydi nga matabo kun an mga musles han pantog in maguba. Ha mga grabe nga kaso, pupuydi nga kinahanglanon nga gumamit hin catheter para la nga matanggal hin sulod an imo pantog.
- Pupuydi nga nakukuha an impeksyon ha urinary tract o UTI ha kababayin-an ha pagpupunas hin ihi tikang ha bobot pakadto ha atubangan, may diabetes, o nagamit hin diaphragm ha pagpaplano han pamilya o pagpugong ha pag ihi. Kun maiha nga natitirok an ihi ha pantog in pupuydi nga dumamo o mag-multiply an bacteria.
- An pagkakamay-ada hin kidney stone o bato ha bato o bladder stone ha pantog kun an ihi in nag iiha ha bato o pantog, o may sulod nga mga mineral o kulang ha gin iinom nga tubig.
