TACLOBAN CITY – Ginkakalipay han mga drivers ngan operators ha syudad han Tacloban an ginlalauman nga oil price rollback nga igpapatuman buwas nga adlaw.
Sumala kan Leo Templado, Vice Chairman han Tacloban Marasbaras Drivers Operators Transport Cooperative, mapasinalamaton hira ha mao nga bigtime rollback ngan ini an siyahan nga higayon nga sugad kahitaas an magiging tapyas ha presyo han produktong petrolyo mahuman an sunod-sunod nga oil price hikes.
Ini daw in dako na nga bulig para ha ira nga mga drivers ngan operators pero padayon la gihapon an ira mga ungara.
Ha pagkayana manggud in humabubo na an ihap han mga pasaheros mahuman an patron han syudad pero naglalaum hira nga madurudamo an ira pasaheros ngan kuhida ha kada adlaw kun mapatuman na an 100% nga face to face classes han mga estudyante.
Padayon gihapon an ira panawagan nga magkaada hira hin padayon nga subsidiya ha ira nga mga drivers ngan operators.
