TACLOBAN CITY – Target han mga atleta ha Leyte delegation nga makakuha hin gold medals ha nakatalaan nga Eastern Visayas Regional Athletic Association (EVRAA) Meet 2019 ngan madara ha pagdudumaraon naman nga Palarong Pambansa ha Davao City.
Sumala kan Romnick Villegas, coach han boxing sports han delegasyon han Leyte, mahugot an ira naging pangandaman ngan training ha upat nga boxers tikang ha Leyte Sports Academy ngan unom pa nga mga boksingero nga tikang naman ha magkadirudilain nga distrito han Leyte para han EVRAA meet.
Gintatalinguha gihapon nira nga mamentinar ngan madepensahan an ira titulo han nakalabay nga tuig kumo champion han boxing competition.
Samtang, sumala naman han usa nga boxer han Leyte delegation nga hi Archie Alao, 17 anyos an pangidaron, unom na katuig nga nagmumulay hin boksing, target niya nga makadaog utro hin gold medal ha EVRAA ngan makaupod utro ha Palarong Pambansa para igrepresentar an Sinirangan Bisayas ha mao nga paisan-isan.
Aminado ini nga naging mahugot an ira pangandaman ngan naging strikto ha ira kinada adlaw nga routine partikular na ha pagmentinar han ira timbang ngan lawas.
Nahibaruan nga han nakalabay nga tuig usa nga gold medal ngan usa nga bronze medal an naiuli han Leyte boxers tikang ha Palarong Pambansa.
