TACLOBAN CITY – Nagpakalatag an mga aktibidadis ha Sto. Niño church para hiton pagdudumaraon nga kapiyestahan han siyudad hiton Tacloban.
Sumala kan Rev. Msgr. Erlito Maraya, Parish Priest Archdiocesan Shrine han Sto. Niño Church, yana nga adlaw magtitikang na an novena masses kun diin siyam kaadlaw ini pagdudumaraon tinikangan June 20 tubtob 28.
Pagdudumaraon na gihapon an balyuan rites yana nga alas 9 han aga kun diin nakansela ini hin duha katuig matungod hiton pandemya.
Labot la ha seremonya han pagbalyuay hiton imahe han Sto. Niño han Basey ngan Tacloban in mayda gihapon pan-bendisyon ngan insenso ha mga imahe.
Ha pareho nga adlaw, maghahatag hin mensahe an tagsa mga Mayor han duha nga lugar agud ig-welcome an nga imahe ni Sr. Sto. Niño.
Magkakamayda gihapon hin gutiay nga kasasaro ngan misa ha Sto. Niño church sugadman an motorcade han duha nga imahe ha mga main street han Tacloban.
Ha sakob hiton nasabi nga siyam kaadlaw, pagdudumaraon kada alas-singko hit aga an (Waray novena mass) samtang pag-abot hiton alas-singko han kulop in pagdudumaraon naman (English novena mass).
