TACLOBAN CITY – Nakalatag na an mga aktibidades nga pagdudumaraon para ha ika 12 nga anibersaryo han Super Typhoon Yolanda yana nga maabot nga Nobyermbre 8, 2025.
An nasabi nga anibersaryo in mayda tema nga “Padayon ha Paglaom, Padayon ha Kinabuhi.”
Sumala kan Abigael Gatela, OIC, City Tourism Operations Office, nakapukos an nasabi nga anibersaryo ha pasasalamat ha mga organisasyon ngan indibidwal nga bumulig kahuman han kalamidad.
Magtitikang naman an mga aktibidades ha Nobyembre 7 pinaagi hin Banal nga Misa ha Anibong Shipwreck Memorial ha 4:30 hiton kulop.
Pag-abot naman hiton Nobyermbre 8, pagdudumaraon an “Round to Remember” fun run ha Leyte Capitol Grounds, tinikangan alas 5:00 hiton aga kun diin mayda naman ine mga pa raffle ngan prizes.
Kahuman han nasabi nga fun run, magkakamayda hin misa, wreath-laying, ngan pagpapabasbas han mass grave ha Holy Cross Memorial kaupod hi Mayor Alfred Romualdez.
Samtang, pagkakulop han nasabi nga adlaw, magkakamayda hin misa ha Yolanda Memorial Marker ngan Candle Lighting Ceremony ha Tacloban City Astrodome.
Kumpirmado gihapon nga maatinder an mga opisyal hiton Japan International Cooperation Agency (JAICA).
Gintagan duon ni Gatela, nga simple la iton pagdumdom ana nga tuig pero, dire la gihapon matutupngan an paglaom, pasasalamat ngan magpapadayon an mga Taclobanon sugadman an tanan nga naka-eksperyensya han makarimadima nga paglasurbo han Super Typhoon Yolanda han tuig 2013.
