Diri na maiha an kapistahan ha Borongan City ngan Calbayog City ha Septyembre 8, ngam kaparte han mga selebrasyon nga ginlalauman nga damu an mga residente nga magkakatitirok ngan mga bisita ha duha nga syudad.
Sumala kan Mayor Jose Ivan Dayan Daga han Borongan City, usa han naiiba nga kultura han mga Borongananon an ira pagkarawat ha mga bisita ha panahon han kapistahan. Diri kinahanglan nga mayda pormal nga imbitasyon para makabisita, tungod kay an mga pamilya mismo an nag-aandam hin pagkaon ngan andam magkarawat hin mga tawo nga maabot ha ira mga panimalay.
Ginpahayag ni Daga nga damo an mga aktibidad nga nakaplano ha Borongan ha panahon han kapistahan. Titikangan an novena, samtang magkakamay-ada liwat kada gab-i nga Praise and Worship Night ha City Plaza nga aatenderan ngan papangunahan han Archdiocese of Borongan.
Dugang pa niya, tikang ha Septyembre 6, magkakamay-ada liwat hin mga bisita ngan mga entertainer nga kabahin han mga aktibidad nga ginsuportahan han pamilya han anay Mayor Maria Fe R. Abunda. An pamilya Abunda in regular nga nasuporta ha mga selebrasyon ha syudad ngan nag-oorganisa liwat hin mga kompetisyon nga kabahin han kapistahan.
Ginpabug-atan ni Daga nga an kapistahan in diri la mahitungod han mga aktibidad ha syudad, kundi higayon liwat ini para mapadayon an kultura han pagkarawat ngan pagkirigta han mga Borongananon. Gin-aghat niya an mga residente ngan mga bisita nga maging kaparte ha mga aktibidad ngan selebrasyon ha syudad.
