TACLOBAN CITY – Patay an usa nga menor de edad ngan samaran liwat an upod hini han maaksidenge an ira ginsasakyan nga motor ha Sitio Crossing, Brgy. Poblacion, Tabango, Leyte.
Sumala kan PSSgt Jale Angelo Dumagsa, imbestigator han Tabango PNP, malaksi daw an padalagan han motor nga ginsasakyan han mga biktima tikang ha Brgy. Campocpoc ngan tikadto kunta ha poblacion han nasabi nga bungto.
Pag abot ha kurbada nga parte han highway in nawarayan hin kontrol ha manibela an drayber hini nga hi Carlos Dahonan Jr, 16 anyos, nga nagin rason han aksidente.
Nahulog ha drainage ha ligid han karsada an motor kaupod drayber ngan han sakay hini nga ginngangaran kan daw kan “Jopel Ridolosa”.
Dayon liwat nagresponde an mga kapulisan ngan MDDRMO Tabango ngan gindara dayon ha Tabango Community Hospital an mga biktima tungod nga seryoso an mga samad nga ira naangkon.
Pira kaminutos la an naglabay han madara hin ha Tabango Community Hospital in gindeklara naman nga patay an drayber samtang ginbal-in liwat Eastern Visayas Regional Medical Center (EVRMC) ha Tacloban an samaran nga hi Ridolosa.
Mababaruan nga parehos taga Brgy. Manlawaan hiton Tabango an mga biktima ngan tiuli na unta ha ira han maaksidente an mga ini.
Waray liwat ini sul-ot nga helmet ngan waray plate number an ginsasakyan hini nga motor.
Sagdon naman han mga kapulisan nga likayan an malaksi nga pagmaneho hin sarakyan ngan magsul-ot pirme hin helmet.
