ODD – Usa nga Italian mechanic an nagpakalas ha industriya han pagmemekaniko mahuman ine nga makabug-os hin pinakamakipot nga kotse tikang ha luma hine nga Fiat Panda.
Hi Andrea Marazzi, usa nga bata nga mekaniko ngan TouTuber, in nag alutaga hin usa katuig para himuon nga “ultra-thin” an usa nga 1993 Fiat Panda. Ha kahilapad nga 50 centimeters, sakto la an mismo driver hine ngan an uusa nga headlight. Nagin irustoryahon online an iya kotse ngan gintawag hine nga “Flat Fiat.”
Gamit an haros ngatanan han orihinal nga pyesa han kotse, ginpaningkamutan ni Marazzi nga aydun, utdon, ngan ig-welding an kotse hasta nga nagin makipot ine. Fully electric na gihapon an kotse nga mayda kahitaas nga 145 cm, kahilaba nga 340 cm, ngan timbang nga 264 kilos.
Dire naman ine pangkarera nga sarakyan, kun diin an top speed hine in 15km/h la ngan kaya makagbiyahe hin 25 km ha usa nga ka-charging cycle han baterya.
Dire gihapon ine aprubado nga gamiton ha karsada; kalipayan la daw ine ngan para mapansin an negosyo ni Marazzi nga junkyard.
Mahitungod ha kasikatan han iya proyekto, plano ni Marazzi nga mag-apply ha Guinness World Records para matagan ine hin titulo nga “narrowest car”.
