TACLOBAN CITY – Ginpahayag han Department of Health (DOH) Regional Office 8 nga diri la gihapon hini bubulkason an measles outbreak ha rehiyon ha kaluyo han paghabubo han kaso han tipdas ha pagkayana.
Sumala kan Elena Villarosa, immunization manager han DOH 8, ha kaluyo han paghabubo han kaso han tipdas dire la gihapon nira ginbubulkas an outbreak ha mao nga sakit mahitungod nga an mga lugar ha Eastern Visayas in kaupod ha endemic areas kun diin malaksi la nga nasarang an mao nga sakit labi na yana nga summer season.
Dugang pa hini nga samtang mayda pa hira nairereport nga measles transmission dire la gihapon bubulkason an outbreak ngan padayon an ira kampanya.
Nahibaruan nga harus katunga na an ginhabubo han ihap han kaso hin tipdas ha rehiyon nga ha pagkayana in maabot ha 1,546 nga kaso.
Ini in pinaagi naman han mas pinahugot nga kampanya han DOH ha pagpadangat han impormasyon bahin han importansya ha pagpapailarom ha measles vaccination.
Mahitungod hini in mas dumamo an boluntaryo nga nagpapabakuna han ira mga anak ngan sugadman mga kalagsan agud nga makalikay ha sakit nga tipdas.
Mahinunumduman nga una na nga nagdurot hin kahadlok ha mga kag-anak nga igpailarom ha vaccination an ira mga anak an nahitabo nga dengvaxia controversy.
