TACLOBAN CITY– Padayon an ginhihimo nga clearing operation han Maripipi Biliran, ha mga kakarsadahan han nasabi nga lugar, dara na gihapon han paglasurbo ni bagyong Tino ha Sinirangan Bisayas.
Sumala kan Mayor Joseph Canonoy Caingcoy , Maripipi Biliran, dire dako an nahipatik nga danyos han bagyong Tino ha ira lugar, matungod nga kakulop pala han aga in nagpatuman na hira hin pre-emptive evacuation ha tanan nga mga residente nga nag-uukoy ha mga low lying areas.
Dugang pa hine nga waray naman hira makurian ha pagpatuman han nasabi nga pre- emptive evacuation matungod nga dayon nga sumunod an mga residente.
Ginmalatumat hine nga nakaka-abat hira yana hiton makusog nga balod ha kadagatan, kun diin iya gin-aabisuhan an mga parupangisda nga likayan la anay an magpalawod matungod nga delikado pa an panahon.
Ha pagkayana, waray pa hira suplay hiton kuryente, waray naman nahipatik nga makusog nga uuran ngan mga pagpan-pan hiton tuna ha nasabi nga bungto.
