TACLOBAN CITY – Pagdudumaraon yana nga adlaw, Agosto 10, an make-up classes han mga iskuylahan ha syudad han Tacloban nga nagdeklara hin suspensyon dida han nakalabay nga Agosto 2, kun diin nagkamay-ada hin Bagong Pilipinas Serbisyo Fair.
Sumala kan Dr. Nilo Eder, Information Officer hiton DepEd Tacloban City Division, duha la nga iskuylahan an dire magdudumara han make-up class yana nga adlaw – amu an City Central School ngan Leyte National High School mahitungod nga an ginsuspendi la hine in an face-to-face class ngan nag-shift dayun ha blended learning.
Mahitungod nga late nga nagpagawas han executive order kasumpay han pagsuspendi han klase an syudad in waray makag-andam an iba nga iskuylahan ha pagbalhin an klase ha online sanglit babaydan han mga istudyante yana nga adlaw an waray nira kasudli nga klase dida han Agosto 2.
Regular naman an magigin schedule han mga make-up classes nga pagdudumaraon yana adlaw, karuyag sidngon, pagsusundon han mga istudyante an ira schedule kaparehas han ira schedule kada weekdays.
