TACLOBAN CITY- Nanawagan an pira nga manbaralaod han Tacloban nga kun mahihimo in paharamub-an an pamasahi pakanhi ha Leyte, matungod nga nakaka-apekto ngan magreresulta han pagutiay hiton turismo nga mapakanhi ha probinsya hiton Leyte, Southern Leyte, Samar, Northern Samar, Eastern Samar, Samar, ngan Biliran.
Sumala kan Atty Jerry Uy, City Councilor Tacloban City, dire ine nakakag-aghat hiton mga bisita matungod nga numero uno nga ginkikita han mga pasaheros in an barato nga pamasahi ha eroplano, kasagaran nga natatabo in nag ka-cutting trip nala an mga ine pakanhi kun diin nakaka-barato an mga pasaheros.
Dugang pa han mao nga konsehal, kinahanglan nga mahihimuan ine hin pamaagi, agud nga humitaas an mga turista dinhi ha Tacloban, ngan makabulig gihapon ha paghitaas han sektor hiton ekonomiya.
Mababaruan, damo mangud an nagpagawas han ira araba kasumpay han kamahal han pamasahe ha eroplano pakanhi ha Leyte, kun diin kadam-an nga mga karuyag bumisita in ginpipili nala nga kumadto ha Cebu City, o mga kahagrani nga lugar kumpara dinhi ha Tacloban o ha probinsya han Leyte.
