TACLOBAN CITY – Duha nga magkabulag nga engkwentro han mga militar ngan mga miyembro han New People’s Army (NPA) an nahitabo ha Brgy. Epaw, Las Navas Northern Samar ngan Brgy. Calundan, San Jorge Samar.
Kasumpay hini, maabot ha 10 nga mga armado nga rebelde an nakaengkwentro han 81st Division Reconnaissance Company han 8th Infantry Division .
Hira in gintutuuhan nga mga miyembro han Front Committee Company, Sub Regional Committee ha ilarom han han usa nga ginngangaran kan Norma Ultra alias Ka Aya, Ka Dodo ngan Ka Basoy.
Umabot naman ha lima kaminutos an naging balyuay hin buto han duha nga kampo pero waray naman nahipatik nga samaran ha panig han mga militar.
Makalabay liwat an usa kaoras, usa pa nga engkwentro an nahitabo ha butnga han 83rd Division Reconnaissance Company (DRC) 8th Infantry Division kon diin 20 nga mga NPAs han Central Front Samar (SRC) Browser an umatake han mga mga kasundaluhan.
An mga armado nga grupo in aada ilarom ni Eldie Dela Cruz alyas Ka Star ngan Bernabe Linay o kon Ka Payo ha Brgy. Calundan San Jorge Samar.
Umabot ha sakob hin baynte minutos an nahitabo nga engkwentro kon diin umeskapo an mga rebelde ha kabukiran.
Dinhe na nakumpiskar han mga militar an pira nga mga subversive nga mga materyales ngan dokumento kaupod an pira nga personal nga gamit han mga rebelde.
Nahibaruan nga an Brgy. Calundan in lima kakilometros la an kahirayo tikang ha Brgy. Bay-ang San Jorge Samar kun diin siyam nga mga sundalo an nahipatik nga samaram mahuman an pan-atake han mga rebelde ngan an lugar gihapon kun diin nakubkob han mga militar an usa nga dako nga kampo han mga NPAs.
Sumala ka Brigadier General Ramil Bitong hiton 803rd Infantry Brigade nga an pakikibinuligay han mga residente nga nadiri na ha mga NPAs an nagin rason han pagkakadiskubre han natura nga kampo.
Padyon naman hini nga gin-aaghat an mga rebelde nga magsurender agud makatagamtam hiton maupay nga benepisyo han E-CLIP program.
