TACLOBAN CITY – Maabot ha P2 million nga kantidad hin kahoy an nakumpiskar han gindumara nga Oplan Sagip Gubat operation han 43rd Infantry Battalion kaupod an City Environment and Natural Resources Office (CENRO) han Catarman, Northern Samar.
Ha mao nga operasyon, maabot ha 1,690 kabug-os hin kahoy nga may 27,600 boadfeet an narekupo han mga otoridad ha Brgy. Happy Valley, San Isidro, Northern Samar.
Sumala kan 1st Lt. Allan Jay Buerano, Civil Military Operations Officer han 43rd Infantry Battalion, ha pagkayana in mayda na hira natudlok nga upat nga persons of interests nga responsable han mga gin-utod nga undocumented lumbers.
Gintutuuhan gihapon han mga otoridad nga posible nga may nagproproteher nga mga miyembro han New People’s Army (NPA) ha nga mga illegal loggers mahitungod nga waray kahadlok an mga ini ha waray habas nga pangutod hin kahoy ha kaluyo han mas pinahugot nga operasyon han mga kasundaluhan ala kontra ha illegal logging.
Ha pagkayana, nagkaada na hin paghimangraw an mga kasundaluhan kaupod an iba pa nga mga ahensya han gobyerno para paghisgutan an kaangayan nga solusyon ha nahurak nga illegal logging ha Northern Samar.
Mahinunumduman nga an hurak nga illegal logging ha mao nga lugar an usa ha gintutuuhan nga rason han grabe nga pagbabaha ha Northern Samar han paglasurbo han Bagyong Usman.
