TACLOBAN CITY – Maabot ha 150 nga mga benepisaryo han Yolanda housing projects ha syudad han Tacloban an natagan na hin land titles yana nga adlaw.
Sumala kan Constancio Atiniero, Regional Manager han National Housing Authority (NHA) Region 8, an mao nga mga benepisaryo nga natagan na hin land titles yana nga adlaw in tikang ha lima nga mga completed housing projects ha Tacloban.
Ha pagkayana in limitado pala an ihap han mga benepisaryo nga natagan nira hin land titles tungod nga hilaba an ira proseso nga ginbubuhat labi na gud ha pagvalidate han kwalipikado nga mga benepisaryo han pabahay.
Ha kaluyo hini in mapapadayon na ha masunod nga mga adlaw ngan semana an ira pagdistribwer hin mga land titles hasta nga maubos tanan han mga benepisaryo han Yolanda permanent housing program ha syudad.
Nahibaruan nga mahugot nga ginpahimatngon han NHA ha mga benepisaryo nga matatagan na hin land titles nga dire nira pwede nga igbaligya o parentahan an ira mga housing units ha sakob hin 20 katuig.
