TACLOBAN CITY – Maabot ha 6,000 nga mga maritime professionals iton ginpailarom ha training han National Maritime Polytechnic (NMP) ha luyo han nagpapadayon nga coronavirus disease (Covid-19) pandemic nga nagin ayat ha operasyon han damo nga mga training institutions.
An NMP in amo an nag uusaan nga government maritime training ngan research center ha nasod nga naghahatag hin mga kurso nga kinahanglanon han mga seafarers para makapagtrabaho hira ha mga barko ngan iba nga nasod.
Sumala kan NMP Executive Director Joel Maglunsod, an ira nga ginpailarom training in ginkakalakipan hin mga aspiring ngan active seafarers, maritime educators, assessors, supervisors ngan iba pa nga mga allied personnel ha maritime industry.
Ha luyo nga temporaryo nga naundang an ira operasyon tungod han COVID 19 lockdown ngan mga public safety measures, gintalinguha han NMP nga makag operate balik gamit an tulo nga modality han panutduan nga ginkakalakipan han coventional learning o face to face nga klase, online class ngan blended learning.
Pero tungod liwat ha hulga han COVID 19, ha pagkayana in mga taga Sinirangan Bisayas la anay an ira ginkakarawat kumo mga estudyante.
Para liwat mas damo pa nga mga seafarer an ira maserbisyuhan, magtitindog an NMP hin mga satellite offices ha Cebu ngan Davao. Pumirma na gihapon an National Maritime Polytechnic (NMP) hin Memorandum of Agreement (MoA) kaupod an Agro-Industrial Foundation College of the Philippines (AIFCP) Incorporated ha Davao para makaghatag hin de kalidad nga Professional Development Course (PDC) para ha Filipino seafarers.
