TACLOBAN CITY – Maabot ha 200 nga mga pamilya ha Samar an bumakwit tikang ha ira tagsa tagsa nga mga panimalay ha San Jose de Buan mahitungod han kahadlok para ha ira seguridad durot han daw ginbubuhat nga pagkampo o militarisasyon han mga kasundaluhan ha ira lugar.
Una hini, nagdurot hin duro nga kahadlok ngan pagkabaraka ha mga residente an nahitabo nga engkwentro ha butnga han tropa han gobyerno ngan rebelde nga grupo nga nagresulta ha usa nga samara nga sundalo.
Sumala kan PSI Constantino Jabonete, hepe han San Jose de Buan MPS, ha pagkayana in nagpapabilin ha evacuation center an mao nga mga pamilya nga maabot ha usa kayukot nga mga indibidwal mahitungod ha kahaldok nga madabi ha posible nga pagkakaada hin utro nga asdangay ha butnga han duha nga kampo.
Iginrereklamo han mga ini nga duro na kaapektado an ira pangukuyan ngan pakabuhi mahitungod han pagkampo han mga kasundaluha ha ira lugar ha Brgy. Hagybay ngan Brgy. San Nicolas ha San Jose de Buan.
Nahibaruan nga an mao nga mga barangay in pira ha mga interior nga barangay ha mao nga bungto han Samar.
Nakatalaan naman nga magkaada hin dayalogo yana nga adlaw ha butnga han mga kapulisan, San Jose de Buan LGU ngan Philippine Army agud nga matagan hin solusyon an mao nga panhitabo.
