Iginduon han Metro Manila Council (MMC) nga waray kalabutan ha tiarabot nga Eleksyon 2028 an pag-aalutaga han gobyerno hin Local Government Support Fund (LGSF) ha mga lokal nga gobyerno.
Sumala kan San Juan City Mayor Francis Zamora, Presidente han MMC, gintutuman la ni Presidente Ferdinand Marcos Jr, an patapod hini nga paksugon an kapas han mga LGUs.
Di pala maiha, nagtirok an 12 Metro Manila mayor ha Malakanyang kaupod hi Executive Secretary Ralph Recto agud paghingadayan an implementasyon han LGSF.
An pondo yana nga 2026 in umabot ha P57.87 bilyon, pinakadako ha kasaysayan, ngan naka-alutaga para ha imprastruktura, disaster preparedness, ngan social services.
Nanawagan hi Recto ha mga LGUs nga siguraduhon an transparent ngan efficient nga paggamit han pondo agud maabat han kada barangay ngan syudad an benepisyo.
Ha kaluyo han mga espekulasyon, iginduon han MMC nga klaro nga nakatutok an LGSF ha pagpapaursa han kumunidad.
Dugang pa han konseho, an panuyo han programa in an mas madig-on nga lokal nga gobyerno nga makakaghatag hin mas maupay nga serbisyo ha mga residente.
