TACLOBAN CITY – Madudus-og iton nakatalaan nga panguli han 93 nga mga linemen nga pumakadto ha Albay para bumulig ha pangayad han mga poste ngan wirings nga nagkakaruruba dida han paglasurbo han Super Typhoon Rolly ngan bagyong Ulysses.
Nakatalaan kunta nga manguli ine dida hiton maabot nga Nobyembre 17 pero gindus-og ine ngada ha Nobyembre 30.
Sumala kan Louiesa Kay Barreto Information & Training Officer / Regulatory Compliance Officer Leyeco lll, nga nagdugang hira hin 13 kaadlaw nga pangayad han mga poste ngan wire nga nagkaruruba han ST Rolly nga nadugngan pa matungod liwat han paglasurbo han bagyong Ulysses.
Target daw nira nga mapalagahan an Albay san-o paman umabot iton kapaskuhan.
Labot la naman ha pagpapadara hin magaayada hin kuryente in naghatag gihapon hira hin mga hinabang sugad han monetary,clothing ngan mga essential needs han mga biktima han bagyo.
