TACLOBAN CITY – Na hit-and-run an usa nga Lineman samtang ini in nagbubuhat hin panhingayad ha linya hiton kuryente nga naapektaran han Bagyong Kristine dida han mga nakalabay nga adlaw.
Sumala kan DORELCO General Manager Chris Garcia nga natabo an mao nga insidente banda alas 6 han gab-i ha Brgy. Paguite, Abuyog, Leyte kun diin, usa nga naharurut nga motorcycle driver an bumundol ha ira Lineman samtang ini in aada ha ligid han karsada nagbubuhat han iya trabaho.
Dugang pa ni Garcia nga waray mag-menor an drayber han motor bisan pa man nagtukod hira hin mga signages ngan vehicle hazard lights.
Ha luyo naman hini, nag-angkon hin minor nga kasamdan an mao nga Lineman ngan aada na ini ha talwas nga sitwasyon.
Nagpahimatngun naman hi Garcia ha mga motorista nga maghinay-hinay, likayi an pagdinagmiton ngan pag-ikmat agud malikayan an bisan ano man nga aksidente ha kakarsadahan.
