TACLOBAN CITY — Arestado an lima nga mga kalalaken-an mahuman an mga ini nga magdumara hin riot ha Old Road Sagkahan siyudad han Tacloban.
Ginkilala an mga suspek nga hira alyas “Julio” ngan “Junrec”, ada ha igo nga pangidaran nga nag-uukoy ha Brgy 60-A Sagkahan, Tacloban; hi alyas “Romer” ngan “Nestor”, ada ha igo nga pangidaran ngan nag-uukoy ha Brgy. 59 Sampaguita, Tacloban; sugadman hi “John” ada gihapon ha igo nga pangidaran nga nag-uukoy ha Brgy. 95 Caibaan Tacloban.
Sumala kan PCapt. Concas Castello, Station Commander han Police Station 1 San Jose, gindangop mismo han usa nga concerned citizen nga mapalit la unta hin sura ha shed kun diin hapit na ini maigo han mag-babtakay na an nasabi nga mga suspek.
Basar ha inisyal nga imbestigasyon, nagdumara hin riot ngan nag-babtakay an mga suspek ha kalsada han nasabi nga baranggay.
Ginsaway pa ngadaw han nasabi nga concerned citizen an nasabi nga mga suspek pero waray an mga ini tumuod.
Sanglit, gindangop hini ha mga kapulisan an nasabi nga insidente rason han kaaresto han mga suspek.
Ha pagkayana, nag-aatubang na ha kaangayan nga sirot an nasabi nga mga suspek matungod ha ira pagtalapas ha RPC Article 155 for Alarm and Scandal.
