TACLOBAN CITY – Maabot ha lima nga mga close contacts ni Mayor Alfred Romualdez an nagpositibo ha COVID-19.
Una hini, nagpapabilin nga nakaisolate ha pagkayana hi Mayor Romualdez mahuman nga magpositibo ha mao nga sakit han naglabay nga mga adlaw.
Sumala kan Dra. Gloria Fabrigas, head han Tacloban City health office, maabot ha 18 nga close contacts han alkalde an ira ginpailarom ha swab test kun diin lima an nagpositibo an resulta.
Upat ha mga ini in asymptomatic samtang usa naman an may pira nga sintomas nga gin-aabat.Ha kaluyo hini in nagtutuo an City health office nga dire hi Mayor Romualdez an maikokonsidera nga index case o gintikangan han mao nga infection tungod nga an mga close contacts hini ha sulod han ira panimalay in nagnegatibo naman ha swab test.
Ha pagkayana in padayon pa an gindudumara nga contact tracing agud nga masiguro nga matutudlok an tanan han mga nakahibalag han alkalde.
