NATIONAL NEWS- Hul-os na nga balaod an balaodnon nga naghahatag hin libre nga serbisyo han lubong para ha mga kablasanon nga pamilyang Pilipino mahuman ine magin balaod, ha kaluyo nga waray ine kapirmahe ni Pangulong Ferdinand Marcos Jr.
An bag-o nga balaod nga Republic Act No. 12309 o “Free Funeral Services Act,” in awtomatiko nga nagin epektibo hadton Setyembre 28, makalabay han 30 ka-adlaw tikang han maisumiter ine ha Kongreso ha Malacañang, alinsunod ha Article VI, Section 27(1) han 1987 Constitution.
Ha ilarom han balaod, an Department of Social Welfare and Development (DSWD) an mangunguna ha paghahatag han libre nga serbisyo ha mga pamilya nga ada ha krisis, kalakip an mga indigent o mga nadarahigan hiton kalamidad.
Sakop gihapon han libre nga funeral package an embalsamo, lamay, cremation o lubong, transpiration, ngan magin lungon o urn.
Para maka-avail, kinahanglan nga magsumiter an pamilya hin death certificate, valid ID, kontrata ha funeral home, ngan social case study tikang ha DSWD social worker.
An mga funeral establishments nga kalakip ha programa in babayaran han DSWD regional offices subay ha aprubado nga kontrata.
An pauna nga pondo in kukuhaon ha P44.75 billion budget han Assistance to Individuals in Crisis Situations (AICS).
