METRO MANILA – Purlomenos P170 billion kada tuig an mawawara nga kuhida han gobyerno kun pananglitan tanggalon an value added tax (VAT) ha mga produktong petrolyo, subay kan Energy Secretary Sharon Garin.
Han usa nga paghirisgot, ginpahayag ni Garin nga an VAT ha petroleum products in naghahatag hin dako nga parte han koleksyon han gobyerno, rason nga an pagtanggal hine in magreresulta ha mas dako nga kakulangan ha kuhida han gobyerno.
Dugang pa, kinahanglanon hin amyenda ha presente nga balaod antis igpatuman an pagtanggal han VAT ha fuel products.
Samtang, ginduon naman ni Marikina Representative Miro Quimbo nga posible magtikaduro an sitwasyon han nasuad kun tatanggalon an VAT, labi na ha butnga han padayon nga kasamok ha Middle East.
Manunumduman, nag-ugat an paghitaas han presyo han lana mahuman an unom ka-semana nga kasamok ha rehiyon, nga nagpaduro han krisis ha Strait of Hormuz, nga usa ha mga pangunahon nga ruta han pankalibutan nga suplay han lana.
Kasumpay hine, padayon an paghitaas han presyo han lana han pankalibutan nga merkado, nga nakaapekto ha Pilipinas nga naglalaom ha purlomenos 98% nga suplay han krudo ha Middle East.
Ha pagkayana, lumahos na ha 100 kada litro an presyo han lana ha nakalabay nga semana, nga nagpabug-at ha sektor han transportasyon ngan pang kabug-usan nga gastuson han mga Pilipino.
